Evrópski tungumáladagurinn

27. september

Í gær, 26. september, var evrópski tungumáladagurinn. Við í Landakotsskóla fögnuðum honum með því að klippa út lauf úr kartoni og fékk hver bekkur sinn lit. Á laufin skrifuðu börnin orðið "ást" á þeim tungumálum sem þau tala heima hjá sér. Laufblöðin hengdu þau svo á tungumálatréð okkar sem hangir inni í matsal og hvetjum við ykkur til að klíkja á það þegar þið komið næst í skólann.

Í tilefni dagsins var nemendum unglingastigs boðið í Veröld, hús Vigdísar Finnbogadóttur, þar sem þau hittu frú Vigdísi, fóru í ratleik og 10.bekkingar fengu að spreyta sig á forngrisku.

Hér má sjá fleiri myndir frá vinnunni við tréð og heimsókninni í Veröld.

Heimsókn frá lögreglunni

25. september 2018

20180919 0912081978

Í síðustu viku kom Guðrún Jack frá lögreglunni til okkar í Landakotsskóla og spjallaði við nemendur á yngsta stigi. Hún ræddi við nemendur um hvernig bregðast ætti við í tælingarmálum, fór yfir helstu umferðarreglur sem þau þurfa að þekkja og minnti á hjálmanotkun. Mjög góð og þörf heimsókn og börnin voru afar áhugasöm.


Dómur völvunnar - sýning í Norræna húsinu

20. september 2018

Í morgun fóru nemendur úr 5. og 6. bekk Landakotsskóla, ásamt kennurum sínum, á sýningu í Norræna húsinu sem ber nafnið Dómur völvunnar. Verkið fór fram á dönsku, en Sverrir Guðjónsson var sögumaður og sagði söguna á íslensku. Verkið var mjög áhugavert og skemmtilegt og hélt áhuga nemenda allan tímann. Fjallaði það um að mennirnir ákölluðu og vöktu upp Völvu sem svo ákallaði Ragnarök, eða heimsendi. Það var svo barn, sem benti þeim fullorðnu á að með því að hugsa um náttúruna mætti bjarga heiminum. Þetta vakti upp margar áhugaverðar spurningar og vangaveltur sem vinna má með áfram innan skólans. Fleiri myndir má sjá hér.